عروس مغتربة

الخطوة الثالثة :
خلاص أنا مستعدة نفسياً والحمد لله متحمسة وكل شي أوكي ، طيب شلون أجهز نفسي ؟ وش أشتري ؟ وش آخذ ؟
هل ألقى الأشياء اللي أبيها هناك ؟ ولا لازم اشحن معاي عفش وحوسة ؟
هنا وقفي شوي : وعطيني إنتباهك ، عن تجربه كل الأشياء اللي بالسعودية متوفرة برا وبالعكس يمكن أفضل من ناحية الجودة والتنوع وكذا ، لأننا الحين في عصر العولمة ف ليه أكلف نفسي وأضيع وقتي وأضيق على نفسي ب أشياء أنا ممكن ألقاها هنآك ؟ :sm4:
الأشياء اللي يمكن ما تلقينها برا :
* حلاوة شعر وممكن تستبدلينها بالشمع المتوفر هنا ب أنواع واشكال مختلفة
* بعض المواعين : فناجيل القهوة طبعاً + دلة القهوة اللي تطبخين القهوة فيها / ترمس مرتب ومناسب للفناجيل + فناجيل الشاهي الزينة [ صح لقيت هنا لكن أشكالها مو مره لو كنتي راعية كشخه ويهمك الشكل خوذي لك طقم اللي فيه 6 فناجيل أرتب لك وخوذي معاه ابريق متوسط ومناسب لها [ هنا صح فيه أباريق بس كلها خزف و الصراحه ما تحفظ الحرارة ]
هذا الشي اللي نقصني أنا ولا كل شي لقيته هنا ، لو ماكان في السوبر ماركت يكون في المحل الإسلامي يعني لا تخافين لو وش مابغيتي ب تلقين حتى لو بغيتي منتجات عربيه تلقين بالسوبر ماركت وحتى اللحوم الحلال صارو يبيعونها بالسوبر ماركت
هنا أنا تكلم من واقع تجربة 4 شهور في كندا الجميلة

الخطوة الرابعة :
تجهيز الملابس و مشتقاتها :
هنا عاد لازم تراعين ان كل واحده تختلف عن الثانية سواء بالمكان اللي بتروح له أو بالوقت ، شلون يختلف بالمكان ؟ انا اقولك مثلا وحده بتروح ماليزيا هل تحتاج الأشياء نفسها اللي تحتاجها وحده بتروح امريكا ؟ لأ طبعا ً لأنه كل مكان يختلف عن الثاني
بس القاعدة العامة هنا تقول : لا تكثرين ملابس ! لأنك ما تدرين وش بتشوفين حتى لو مثلا سألتي زوجك وقالك والله جيبي كذا ولا كذا ! انتبهي لا تعتمدين على كلامه 100 % لأن الرجال ترى تفكيرهم غيير مرره :sm4b189
اول شي انتظري ليين يتحدد موعد زواجك وموعد سفرك بالضبط عشان تترتب امورك وتعرفين وش تحتاجين
وهنا نلقى نوعين من البنات :
الأول : اللي يصير لهم بيت بالسعودية وراح تكون الفترة الي بين الزواج والسفر أكثر من 4 شهور هنا أقولك معليه يا قلبي قضي زي العرايس العاديات ما يقضون لأنك مطوله وبيصير لك طلعات و روحات وجيات وعزايم وحفلات
وإذا قربت روحتك تعالي واقري القسم الثاني من العرايس ؛
الثاني : الي ما تطول بالسعودية ؛ يعني مافي ذاك الفتره مابين زواجها وسفرها هذي تجي أخمها وتقعد جنبي عشان نكمل سوالفنا
هنا يا عزيزتي العروسه أنتِ غيير جداً عن الباقين يعني تحتاجين أشياء زيادة وفيه أشياء ماتحتاجينها أصلاً !
وفيما يلي < -- يمديكم باللهي ؟ قائمة انا كتبتها لصديقتي اللي مسافرة قريب أتمنى انها تفيدكم + إني كاتبه لها بعض النصائح لترتيب الشناط
منقول

طبعا بعد تجربة 4 شهور غربه ببريطانيا ممكن اختصر اللسته بالاشياء هذي:

1- تمرثم تمر ثم تمر ,, حتى لو ماتاكلون التمر كثير .. بالغربة راح تاكلونه وتلحسون كراتينه بعد .. ما ادري هو شعور بالحنين للوطن ولا ايش .. مع اني بالسعودية ماكنت اكل الا تمرتين بالاسبوع ويمكن اقل ,, بس لما تغربت صرت احبه كثير .. والمشكلة انه الحين قرب يخلص وتوهقت ,, عشان كذا احرصوا تكثرون منه .

2- بيجامات قطنية داخليه .. لان البرد هنا يوصل لتحت الصفر

3-للبرادات وبالذات الي جايين وقت البرد و ما يلبسون عبايات بالسفر,, تحتاجون تجيبون كم بنطلون طلعات اكبر من مقاسكم بشوي عشان تقدرين تلبسين تحتها البيجامة القطن
معلومة ممكن تكون مو مهمه للكل , بس انا انسانه برااادة واحتاج ادبل بكل شي , والمشكلة كل شي كان على مقاسي بالملم فتشوفوني رجعت ادور بناطيل اكبر بشوي )

4- ملابس شتوية ( لا تخلين شي بخاطرك ) ابتداء من القلفزات لما الشرابات

5- مترجم الكتروني صغير للشنطة ,, وهذا شي ما حسبت حسابه واعتمدت على ثقافتي وتندمت

6- المحولات الصغيره ( القسامات - الافياش) ,, لان الفتحات عندهم ببريطانيا ماتجي الا 3 فقط

7- طاحونة مولينكس صغيرة للقهوة , اذا كنتي من النوع الي يحب القهوة والهيل Fresh يعني تحبين تطحنينها بنفسك اول بأول.

8- اهم شي أدوية البرد .. لان هنا مايصرفون لك .. فاذا كنتي تعرفين علاجاتك الي تحتاجينها لنزلات البرد جيبي منها وكثري .

9- محفظة قروش صغيره ,, عشان ماتبحلين بقروشك وتصيرين تنطلينها بالشنطة ولا تحطينها بعلبة النظارات

اما باقي الاشياء , راح تلقونها هنا وبأفضل كواليتي كمان لا تشيلون هم